Twitter

Помош од 600 до 800 денари месечно за сметките за струја ќе добијат семејствата во социјален ризик, со најновата владина мерка - субвенционирање за трошоците за електрична енергија за домаќинстватав со ниски примања.

За таа цел одвоени се вкупно 60 милиони денари од страна на државата за социјалните категории на граѓани чии месечни примања не надминуваат над 30.000 денари. По категории, право на субвенционирање за електрична енергија имаат следните семејни заедници:

- самец до 15.194 денари;

- домаќинство со два члена до 18.000 денари;

- домаќинство со три члена до 21.000 денари

- домаќинство со четири члена до 25.000 денари; и

- домаќинство со пет и повеќе члена до 30.000 денари

Пријавувањето за користење на оваа субвенција почнува од денеска.

Граѓаните треба да аплицираат во Министерството за економија, а во прилог меѓудругото ќе треба да достават потврда за висина на исплатена плата, потврда од Агенцијата за вработување доколку лицата не се вработени, фотокопија од последната добиена сметка за потрошена електрична енергија во 2021.

Според јавниот оглас објавен на веб- страната на Министерството за економија, лицата со ниски примања се стекнуваат со финансиска поддршка преку намалување на месечната сметка за потрошена електрична енергија во износ од 600 до 800 денари месечно сметано од денот на поднесување на барањето.

Рокот за аплицирање по овој јавен оглас изнесува 30 дена сметано од денот на објавување на јавниот оглас.

Јавниот повик и потребната документација може да ја најдете на веб-страната на Министерството за економија на следниот линк: https://www.economy.gov.mk/doc/3070

Од почетокот на новата 2022 година, сметките за струја се повисоки за 9,48% а воедно беше укината и дневната евтина тарифа од 14 до 16 часот.