Подобрување на стамбените услови за живот на 52 социјално загрозени семејства ќе биде решено со изградба на социјалната зграда чија вредност е 80 милиони денари.
Работите на терен се интензивираат, а денеска градежната оператива ја посети министерот за транспорт и врски Благоја Бочварски заедно со директорот на АД за станбен и деловен простор Кристијан Трајковски, кои се инвеститори на проектот.
Објектот се гради во месноста поранешна „Касарна“ за која цел Општина Гевгелија одобри парцела која е во државна сопственост. Истиот ќе биде наменет за домување на социјално загрозени семејства од Општината.

- „Можам да најавам крупни капитални проекти за развој на Гевгелија и подобрување на условите за живеење на жителите на Гевгелија. Освен оваа градба за ваква наммена одвоени се вкупно 130 милиони денари“ истакна при посетата во Гевгелија министерот Бочварски.

- Преку КФВ банката започнуваме со реализација на четири проекти за подобрување на комуналната мрежа, инвестиција од преку 2 милиони евра.
- Годинава започнуваме со постапки за изградба на гасоводот од Неготино до Гевгелија и понатаму со интерконекторот до Грција.
- Предвидено е реконструкција на улици во општината преку средства од Министерството за транспорт и врски и други проекти со кои ќе придонесеме за економскиот развој на градот и овој регион.

Инаку, освен во Гевгелија вакви социјални згради со вкупно 600 станбени единици се градат на повеќе места во државта. Зградата во Гевгелија треба да биде готова и порано од предвидениот рок и да финишира во март 2022 година, информираше министерот за транспорт и врски Благој Бочварски при денешниот увид на градежните работи.