Приоритет број еден на општина Дојран е заштитата на Дојранското езеро, природното богатство кое што ја детерминира самата општина, економски и урбано.
Денеска токму езерото неговата заштита и конзервација на состојбата и постојниот биодиверзитет беa предмет на потпишување на меморандум за соработка со меѓународна организација со седиште во Скопје.

- „На наше големо задоволство потпишан е меморандум за соработка со меѓународната невладина организација „Милиеуконтакт Македонија“, а со самото потпишување Општина Дојран ќе има силен партнер во зачувување на животната средина, грижа за нашиот бисер Дојранското езеро и неговиот биодеверзитет. Ангажирањето на партнер каков што е Милиеуконтакт, посебно со ставање на располагање на сите експерти од областа на животна средина и екологија, ќе значи зголемен капацитет на Општина Дојран во изработка и аплицирање на проекти од оваа област, како и добивање на финансиски средства за истите“ истакна денеска градоначалникот на општина Дојран Анго Ангов.
Тој нагласува дека со помош на „Милиеуконтакт Македонија“ ќе се формираат тимови од општината кои заедно со експертите ќе работат и ќе се обучуваат, со главен акцент да се спречат загадувачите на езерото, да се зачува квалитетот на водата во езерото, а со тоа е задржуваат трајните вредности на самата Општина.
- „Ставањето и пуштање во употреба на трите реконструирани куќи кои се направени со цел да служат како научно едукативен центар, ја овозможуваат и основата за спроведување на сето ова кое е зацртано како еден од врвните приоритети“.

- „Меморандумот за соработка значи заеднички проекти со општината за подобро управување на Дојранското езеро, исто така зголемување на управувачките капацитети, но и проекти насочени директно за конзервација и подобрување на биодиверзитетот. За тоа се потребни јаки капацитети на управувачкиот орган и за тоа се надеваме на еден микс, односно мешавина на директни конзервациски мерки и засилено управување со езерото. Еден од најбитните документи во таа насока е изготвување на планот за управување со Дојранското езеро кој што го правиме во склоп на проектот кој е финансиран од партнерскиот фонд за критични еко системи кој конкретно ќе ни укаже што треба да се работи на Дојранското езеро. Планот би требало да биде готов следната година на пролет, но и без него веќе може да се работи на конкретно отклонување на еколошките загадувачи на езерото за кои се знае и не е потребен научен доказ“ истакна претставник на „Милиеуконтакт Македонија“ од Скопје.

Градоначалникот Ангов потсети дека грижата за езерото не е заборавена ниту од Владата на РСМ која во буџетот за следната година има планирано средства за реконструкција на пречистителната станица во Дојран која е еден од загадувачите на езерото. Со тоа ќе се реши овој проблем, нагласи тој.