- „Нема да дозволиме уште едни криминални избори. Ќе се спротивставиме оти Македонија е и наша земја“, порачаа челниците на СДСМ -Претседателот на СДСМ, Зоран Заев и заменик претседателката, Радмила Шеќеринска при вечерашната посетата на Гевгелија.

Претседателот Заев посочи дека Гевгелија се наоѓа на портата на Европа, но благодарение на оваа власт, таа порта со години е затворена.

- „И покрај кандидатскиот статус во 2005 година, портата на Европа за Македонија, останува затворена и се држи Македонија изолирана. Зошто? За да може да не биде под послушност на европските закони и правила. За да може да троши  500 милиони евра на споменици и музеи, додека народот му е гладен на нашиот досегашен премиер. За да се пљачка без никаква контрола, надвор од сите европски правила и стандарди, кои важат во демократските земји“, оцени Заев пред гевгеличани.

- „На 13-ти сите заедно ќе ја испратиме пораката дека Македонија ќе добие претседател како што доликува и заслужува, а при тоа ќе најави и заминување на оваа власт“, додаде Заев.

Тој се заблагодари за работата на досегашниот пратеник Саве Марачков, за кој најави дека  треба да биде дел од идната извршна власт.

Заменик претседателката, Радмила Шеќеринска рече дека на 13-ти април битката е за вистински претседател, но и за промени во секоја област од нашето живеење, битка за иднината на Република Македонија.

- „Секое дете заслужува мирно детство. Секој човек заслужува вистинска шанса. А секоја нормална држава, ама баш секоја, заслужува вистински претседател“, нагласи во своето обраќање Радмила Шеќеринска.