Легална регистрација во Македонија со 50 од сто намалени трошоци е новата законска мерка која овозможува возилата со странски регистарски ознаки да се регистрираат во државата. Ваквите возила кои ги користат македонски сопственици веќе нема да мора да излегуваат од државата за да се регистрираат во земјата каде регистрационо се заведени, туку тоа ќе можат да го сторат дома. Ова на социјалните мрежи вечерва го објави премиерот на РСМ Зоран Заев кој напиша:

„Возилата со странски регистарски таблички ќе може да се регистрираат со 50% намалени давачки, од утврдената вредност на сите давачки кои се наплатуваат при увоз од страна на надлежните државни органи.

Оние кои имаат поднесено барање за регистрација, задолжително треба да ги исполнуваат следните услови:

- да ги имаат регулирано царинските и даночните обврски за возилото во рок од шест месеци од денот на влегувањето во сила на овој закон и да поседуваат важечка сообраќајна дозвола, осигурување и зелен картон;

- да влегле на територијата на Република Северна Македонија до 1 октомври 2020 година.

Со ова, законски создадовме можност за регистрација на возилата кои се со странски таблички, со цел регистрацијата да биде дома, а средства да одат за патишта, за општините, како и за важни фондови за државата“, напиша вечерва на социјалните мрежи премиерот Заев.

Законот кој ја регулира оваа мерка ги опфаќа моторните возила за превоз на патници (категорија М), возилата за превоз на товар (категорија N), возилата на две и три тркала и квадрацикли (категорија L) и приколки – вклучително и полуприколки (категорија О).

Со оваа мерка ќе се обезбеди системско регулирање на учеството на овие возила во сообраќајот и приход на средства кон буџетот и домашната економија во висина од 25 милиони евра кои ќе бидат наменети за проекти од интерес на граѓаните“, соопштуваат од Владата.