Подмладената македонска ракометна репрезентација не можеше на терен да и' парира и да ја надигра нестандардната постава на шведската ракометна репрезентација во првиот дуел од групата „Г“ на Светското првенство во ракомет, Египет 2021, што се одигра вечерва.

Брзата игра и убедливиот пораз од 32-20 од селекцијата на Шведска не остави простор за изненадување против фаворитот пред македонските репрезентативци. Швеѓаните настапија без деветмина стандардни првотимци, но дури и со таков состав делуваа премоќно во однос на нашиот подмладен тим, доминираа во секој аспект на ракометната игра и заслужено стигнаа до убедлив триумф. Македонија одигра катастрофално во одбраната во голем дел од натпреварот, немајќи одговор за брзата игра на противникот, но имавме сериозен проблем и во нападот, за што доволен доказ е бројот на постигнати погодоци.

Првиот напад го имаше Македонија, Стоилов изнуди исклучување, а Мартин Поповски извонредно реализираше од крило на асистенција на Лазаров. Во следнот напад Стоилов погоди за водство од 2-1, но Швеѓаните одговорија со два гола за нивна прва предност на мечот (2-3). Одбраната имаше многу проблеми да ги запре шведските напади, па во првите девет минути примивме шест погодоци (4-6). Лазаров во 10. минута го промаши и вториот шут во низа, а Ване реализираше од контранапад за најубедливи 4-7.

Противникот сепак го диктираше темпото до крајот на полувремето и на одмор замина со 16-11, a натпреварот заврши со победа на Шведска од 12 голови предност и резултат 32:20.

Кире Лазаров со пет гола (три од пенал) беше најефикасен во македонскиот состав, додека по двапати прецизни беа Стоилов, Пешевски, Поповски и Костески. Најдобар поединец на натпреварот беше Швеѓанецот Ване со 11 погодоци.

Следен предизвик за македонската репрезентација е дуелот со домаќинот Египет, што на програмата е в сабота со почеток во 18 часот.