Гевгелискиот Планинарски спортски клуб „Двете уши“ на 14,5 месеци од своето формирање доби свои работни простории. Општина Гевгелија и Советот на општината му отстапија на користење јавен простор лоциран во Старата гевгелиска чаршија.
Чинот на свеченото отварање на просториите на клубот беше реализиран пред два дена со свечена седница на членовите на ПСК на која учествоваа и гости од локалната самоуправа.
ПСК „Двете уши“ за кратко време се етаблира во спортскиот живот на Гевгелија, најпрво организирајќи над 70 акции во изминатиот период, искачени државни и балкански врвови, учество на меѓународни акции, републички признанија и награди за најуспешните учесници од клубот. Круна на вакавите завидни залагања се препознаените вредности на ангажираните гевгелиски планинари, нивните долгогодишни искуства и поставувањето основа за нови приврзаници на планинарењето и спортот е токму доделувањето на трајни работни простории на клубот, се разбира се' додека работи на линијата на своите програмски цели, а тоа е омасиоввањето на спортот и локални приврзаници на спортот во Гевгелија.

На свечената седница раководството на ПСК „Двете уши“ се заблагодари на соработката и разбирањето на локалната самоуправа, Советот и градоначалникот, а на своите членови им го офијализираше членството во клубот со доделување на членски книшки со грбот и печат од ПСК „Двете уши“.

- „ПСК „ДВЕТЕ УШИ“ Гевгелија секоја среда со почеток во 19.00 часот одржува редовен состанок кој е отворен за јавноста. Ве покануваме Вас наши сограѓани и сите кои сте дел од оваа заедница како и љубители на планинарските спортови да не посетите, да се информирате и да бидете дел од сите идни планинарски акции.
Ние сме доброволно, непрофитно, невладино, непартиско здружение на граѓани, формирано со слободно здружување на граѓаните заради остварување и заштита на цели, интереси и активности кои се во насока на развој и подобрување на квалитетот на планинарските спортови во општина Гевгелија“, напишаа на социјалните мрежи од Клубот за својата новина со покана до граѓаните да ги посетат и да им се придружат во акциите.

Честитки за успесите, со акции и нови достигнувања да ги полните извештаите на работните состаноци, а витрините со трофеи.